සම්පිණ්ඩණ රීති 001
සරල රේඛාවක් සහ වෘතයක්
සරල රේඛාවක් සහ වෘතයක්
පමණක් භාවිතා කරලා
අඳින චිත්‍රයකින් වුවත්
සංවේදී හිත්වල හැඟීම්
උත්තේජනය කරන්න පුළුවන්.
ඒ සඳහා ගැලපෙන
සම්පිණ්ඩණයක් අවශ්‍යයි.
සම්පිණ්ඩණ වෙනස් වෙනකොට
ඇතිවෙන හැඟීම් වෙනස්.
චිත්‍රයක්, ඡායාරූපයක් කියන්නෙ
සංඝටක රැසක සම්පිණ්ඩණයක්.
ශිල්පියා රීති ගැන දැනුවත් වෙලා
හිතාමතා සම්පිණ්ඩණය නොකළත්
හැම නිර්මාණයක්ම සම්පිණ්ඩණයක්.
මේ චිත්‍ර කිහිපය
රේඛාවක සහ වෘතයක
සරල සම්පිණ්ඩනයක්.
මූලික සැකිල්ලක්.
පසුව තවත් අංග එක් කරමින්
වර්ණ යොදමින් යනකොට
චිත්‍රයක් බිහි වෙනවා.
සමස්ත විශ්වයම සම්පිණ්ඩණයක්.
අපි වෙසෙන මේ මඟුල් සක්වල
සෞරග්‍රහ මණ්ඩලය, පෘථිවිය
ආසියාව, අපේ රට, ගම හෝ නගරය
මේ සියල්ලම සම්පිණ්ඩණ.
අපේ මිදුල, නිවස, ආලින්දය
අපේ කාමරය, මේසය, අපි...
අපේ සිත හා කය ආදී සියල්ලම
විවිධ සංඝටකවල සම්පිණ්ඩණ.
මේ සම්පිණ්ඩණ හදාරන්න තමයි
අපි පාසලට, සරසවියට යන්නෙ.
දක්ෂ ගුරුවරු ඔවුන්ගේ දැනුම
සිසුවාට දිරවන්න පහසු වෙන්න
සම්පිණ්ඩණය කරනවා.
හැම දක්ෂයෙක්ම මතුවෙන්නෙ
තමන් සතු දේ සම්පිණ්ඩණයට
දක්වන හැකියාව මතයි.
විද්‍යාව සම්පිණ්ඩණවලත්
සංකීර්ණ සම්පිණ්ඩණයක්..
සංගීතය නර්තනය ආදියෙදි
රිද්මයානුකූල සම්පිණ්ඩණවලින්
මනස උත්තේජනය කරනවා.
චිත්‍රයත් ඇස හරහා කරන්නෙ
එවැනි පරිවර්තනයක්.
ඒ පරිවර්තනය නිසා අපේ සිතේ
කම්පන මාලා ප්‍රියමනාප නම්
අපි ඒ නිර්මාණවලට බැඳෙනවා.
චිත්‍රයක්, ඡායාරූපයක් කියන්නෙ
රේඛා, වර්ණ, හැඩතල ආදී
සංඝටක රැසක සම්පිණ්ඩණයක්.
ශිල්පියා රීති ගැන දැනුවත් වෙලා
හිතාමතා සම්පිණ්ඩණය නොකළත්
හැම නිර්මාණයක්ම සම්පිණ්ඩණයක්.
යම් හැදෑරීමක් සහිතව
තමාගේ නිර්මාණය මගින් සිදුවෙන
වෙනස ගැන අවධියෙන් කරන නිර්මාණ
රසිකයාට මග පෙන්වීමක් කරනවා.
අපි පෙන්වන්නෙ මළ හිරු බසින
සුන්දර සැන්දෑවක අහස නම්
අපි ඔහුට වෙරළ පෙන්වන්නෙ අඩුවෙන්.
සමහර විට වෙරළ ඉඟියක් විතරයි.
අපි මළ හිරු සහ වර්ණවත් අහසට
මූලික අවධානය ලැබෙන විදියට
සම්පිණ්ඩණය යොදා ගන්නවා.
සම්පිණ්ඩණය කළ චිත්‍ර වල
රිද්මයක්, පිළිවෙලක්, සරල බවක්
බැලූ බැල්මටම දකින්න තියනවා.
බෝමලුවට බේබද්දෙක් වගේ
නොගැලපෙන අංග එක්වෙලා
චිත්‍රයේ අගය බාල වෙන්නෙ
සම්පිණ්ඩණය වැරදීමෙනුයි.
අකිරා කුරොසාවා හෝ
එවැනි වෙනත් කලාකරුවෙක් කිව්වා...
"කලා නිර්මාණයක අගය වැඩිවෙන්නෙ
නිර්මාණයට එක් කරන දෙයින් නොව
ඉවත් කරන දෙයින්" කියලා.
චිත්‍රයක, ඡායාරූපයක
සම්පිණ්ඩනයට බලපාන රීති
රැසක් ලෝකයේ ප්‍රචලිතයි.
ඉදිරියෙදි සලකා බලමු.
No comments:
Post a Comment